Könnun Samtaka skattgreiðenda, á fjölda ríkisstarfsmanna, heldur áfram að vekja spurningar fremur en svör. Samtökin fengu á dögunum svar frá Utanríkisráðuneyti við einni af fjölmörgum fyrirspurnum sem sendar hafa verið sem lúta að upplýsingaóreiðu ráðuneytisins í gögnum um starfsmannafjölda.
Við höfum núna þrjár mismunandi heimildir um starfsmannafjölda ráðuneytisins. Ein er þingskjal nr. 358 frá 154. löggjafarþingi 2023-2024 sem sýnir fjölda stöðugilda í lok október ár hvert á tímabilinu 2011 til 2022. Önnur er fjöldi stöðugilda sem gefinn er upp í ársreikningum ráðuneytisins ár hvert á tímabilinu 2017 til og með 2024, en þá er um að ræða meðalfjölda stöðugilda yfir árið. Næst höfum við nýjustu heimildina sem kom með svari ráðuneytisins og sýnir heildarfjölda starfsmanna sem fengu laun greidd einhvern tíman á hverju ári tímabilsins 2018 til 2024. Mikilvægt er að hafa í huga hér að fleiri en einn starfsmaður geta sinnt einu stöðugildi, t.d. ef tveir starfsmenn vinna 50% hlutastarf, þá er fjöldi starfsmanna tveir en fjöldi stöðugilda sem þeir sinna eitt stöðugildi.
Taflan sýnir samantekt tölum um fjölda starfsmanna og stöðugilda í þessum þremur heimildum. Efsta taflan sýnir tölur um fjölda stöðugilda sem fram koma í áður nefndu þingskjali sem ná einungis til 2022. Miðtaflan sýnir samantekt á tölum um fjölda stöðugilda sem ráðuneytið skráir í ársreikninga viðkomandi stofnunar. Neðsta taflan sýnir tölur um fjölda starfsmanna sem fengu laun greidd einhvern tíman á árinu undir hverri stofnun. Tölur um starfsmannafjölda eru ekki lagðar saman þar sem eitthvað er um tvítalda starfsmenn í þessum tölum – starfsmenn sem starfa hjá fleiri en einni stofnun innan töflunnar. Bandstrik merkir að tölur komi ekki fram í heimild, eða að heimild sé ekki til fyrir viðkomandi þátt. Núll, þýðir að núll er skráð í viðkomandi heimild.
Viðbúið er að smávægilegur munur geti verið á tölum, eftir því hvort miðað er við fjölda stöðugilda í lok október ár hvert, eða meðalfjölda stöðugilda yfir árið. Sjá t.d. Utanríkisráðuneyti – aðalskrifstofa, og Þýðingamiðstöð Utanríkisráðuneytis í fyrstu og annarri línu. Það sem er merkt með gulu og bláu er hins vegar misræmi sem getur varla átt sér sömu skýringu. Í tilviki Sendiráða Íslands gefur ráðuneytið upp tvisvar sinnum hærri fjölda stöðugilda í ársreikningum sínum en það gerir í svari við þingfyrirspurn og er munurinn tiltölulega jafn öll árin. Í tilviki Alþjóðlegrar þróunarsamvinnu hefur misræmið annað mynstur. Ráðuneytið gefur upp 12% hærri fjölda stöðugilda í svari við þingfyrirspurn, en það gerir í ársreikningum sínum, við upphaf tímabils. Í lok tímabils hefur þetta snúist við og ráðuneytið gefur upp 30% lægri fjölda í svari við þingfyrirspurn en það gerir í ársreikningi sínum. Loks sjáum við hér afar áhugaverðar tölur undir 03190 – Ýmis verkefni; árið 2021 mynda 23 starfsmenn hálft stöðugildi og árið 2023 mynda 157 starfsmenn núll stöðugildi. Skattgreiðendur ættu að hafa þetta bakvið eyrað næst þegar ríkið matreiðir ofan í okkur tölur um starfsmannafjölda sinn – mældan í meðalfjölda stöðugilda.
Starfsemi Samtaka skattgreiðenda er rekin fyrir mánaðarlega styrki almennings. Ef þú vilt koma í hóp velgjörðarmanna okkar, er hægt að styrkja samtökin hérna eða senda okkur póst til að fá nánari kynningu á starfseminni á upplysingar@skattgreidendur.is
